Kerähmöh otti ošua eri kanšojen 110 etuštajua Venäjän 43 alovehelta. Karjalan etuštajina oltih nellä ihmistä – Anna Anhimova, Tatjana Islamajeva, Irina Pogrebovskaja ta Julija Filippova. Tilaisuon avajaisissa tervehyššanoja Karjalašta kuulu kolmella kielellä: karjalakši, vepšäkši ta šuomekši.
Kanšanetuštajat kerrottih mimmosie tulokšie hyö šuatih kielien ta kulttuurien šäilyttämistoiminnašša. Aika oli rajotettu, šentäh jokahini ei voinun kertuo omašta ruavošta, vain jokahini šai uušie ajatukšie ta idejoja.
– On mukava, jotta mie olin Karjalan etuštajien joukošša ta jotta miula annettih pakinavuoro. Mie kerroin meijän projektiloista ta kuulin äijän mukavie idejoja. Mimmosie videoita omalla kielellä šuau kuvata, mitein šuau elvyttyä šanomalehtie käyttyän QR-koodija, kumpasien kautti šuau nähä lisyä materialie internetissä. Piäajatukšena on še, jotta pitäy olla šuuri tahto, šilloin myö yheššä piäšemmä hyvih tulokših, kerto Oma tulehmo -järještön johtaja, Veškelykšen kyläkunnan piämieš Irina Pogrebovskaja.
Šuomelais-ugrilaisien kanšojen VII kerähmön ruavon tulokšet ollah jo valmehet. Piätarkotukšena on še, jotta kantakanšojen alottehie pitäy kannattua, kehittyä kieltä ta kulttuurie käyttyän nykyaikasie teknologijoja, kiinittyä enemmän huomijuo etnoturismilla ta muanittua nuorie kanšalliseh toimintah.