Uded painused: Läksi jäl’geline vepsänkeližen al’manahan nomer
Jo enamba kümned vot vepsänkeline literaturine al’manah ”Verez tullei” ihastoitab ičeze lugijoid, starinočeb kaikiš tärktembiš azjoiš vepsän rahvahan elos, melentartuižiš ristituiš, tundištoitab uden prozanke da runoidenke.
Neciš al’manahas voib löuta melentartuižid materialoid kut aigvoččile, muga lapsile-ki. Ei amu Nina Zaiceva om kirjutanu ezmäižen povestin vepsän kelel ”Minun vepsläine oza”. Lugijad voib löuta sen palan jo neciš al’manahan nomeras.
— Ičein povestin pohjaze otin johtutesid ičeze kodikülän eläjiš, niiden elos, veroiš. Ozutin, kut minun päheng – neičukaine Veraine kazvoi, tedišti peitazjoid ičeze sündundas, kut hän openzihe eläda külän veroiden mödhe. Hänen elo-oza ei olend kebn... No hänen rahavahan vahvad jured, ned eloverod, miččid hän om sanu baboišpäi i dedoišpäi, ümbriolijoš eläjišpäi tegiba händast todesižeks vepsläižeks, ičeze kelen tundijaks i navedijaks, ičeze rahavahan sirdäjaks edehepäi, sanub Nina Zaiceva.
Al’manahad čomenzoitaba tetaban Karjalas fotografan Ilja Timinan fotod. Sen voib ostta ”Periodika”-paindištos. Sen arv om 130 rubl’ad.
