TV-radnikoiden fil’m Karjalaspäi oli arvostadud konkursal Piteriš
GTRK ”Karelia”-radnik, Maria Šašina sai pauklahjan ühtes konkursan nominacijoišpäi.
Konkurs mäni jo 19 kerdan. Kaikuččel vodel sihe oigetas enamba 500 töd Venäman öbokaspäi. Täl vodel Karjalaspäi parahimiden lugetišhe putuiba koumen radkundan töd. Vägestajaks tegihe GTRK ”Karelia”-radkund ”Jätan ičein jäl’gen” (”Последний из Чайгино”)-fil’m (18+). Se sai pauklahjan”Hengenkosketai süžet. Parahim programm!”-nominacijas.
- Meiden fil’m om mecnikas Sergei F’odorovas, kudambanke minä tundištimoi jo erasid vozid tagaze radmatkas. Meiden tundištoituz muga kosketi minun henged, miše tahtoižin tehta hänes fil’man. Se ozastui meile. Sergei F’odorov eläb üks’näze Čaigal’-vepsläižes küläs, no ei unohta vepsän kel’t. Hän lujas navedib ičeze kodimad, sanui fil’man scenarijan kirjutai Maria Šašina.
21. redukud Piteriš tehtihe ”SeZaM-2021”- öbokan lehtez-, TV- da radioradnikoiden konkursan ühthevedoid.
