Oma Mua -lehti jo toista vuotta pitäy projektie “Kiännämmä yheššä”. Elokuun lopušša lehen toimittajat Maikki Spitsina ta Uljana Tikkanen piettih seminari seesjärven karjalaisien kera Puatenen kyläššä.
Oli mukava tutuštuo Karhumäjen piirin karjalaisih, kuunnella heijän murrehta, tiijuštua paikallisien eläjien ta kylien kohtaloista.
– Valmistelun aikana tiijuštima, jotta paikalliset karjalaiset hyvin paissah muamon kielellä, ka ei malteta lukie eikä kirjuttua. Ken tahtou kirjuttua mitänih karjalakši käytetäh venäläisie kirjaimie, šano seminarin vetäjä Uljana Tikkanen.
– Kiännämmä yheššä -projektin aikana myö opaššamma kiäntämäh venäjän kieleštä karjalakši. Puatenešša piti vielä tutuštuo seminarin ošanottajie karjalan kielen kirjaimih, šelittyä mitein lukie ta kirjuttua karjalakši, lisäsi Oma Mua -lehen toimittaja Maikki Spitsina.
Kiännettäväkši oli valittu Sergei Georgijevin teksti. Nykyaikani kirjailija Sergei Georgijev kirjuttau kertomukšie lapšilla. Niijen mukah on kuvattu ni “Jeralašin” monie huumorilaisie šarjoja.
Täštä pieneštä aškelešta alko puatenelaisien tutuštumini karjalan kirjakieleh. Naiset koroššettih, jotta još tämmösie oppituntija piettäis rikenempäh, ni varmašti hyö ruttoh opaššuttais lukomah ta kirjuttamah.
Kiännämmä yheššä -projektie pietäh Karjalan Šivissyššeuran kannatukšella.
Lisyä lukekkua Oma Mua -lehen 34. numerošta