Tänä vuotena Tule pakinoilla -kerhon toimenpitoja pietäh Karjalan Rahvahan Liiton toteuttaman Karjalaini etnoklasteri -projektin rajoissa. Joka pyhänäpiänä kielikerhon jäšenet kiirehetäh Tatjana Sidorovan pitämih kurššiloih.
— Projektin rajoissa myö šaima metodista kirjallisutta, kanšlijatavaroita. Oma Mua -lehti nyt joka netäli tulou pos’olkan kirjaštoh. Myö ylen vuotama Ol’ga Karlovan Vienankarjalan alkeiskuršši -oppikirjua, kumpasen avulla opaššumma karjalan kieltä, šano kurššien vetäjä Tatjana Sidorova.
Kurššien ohjelmašša on kielioppi- ta šanaštoteemoja, šekä kotišeututietoja karjalan kieleštä ta kulttuurista.
Ohjelma on valmis monekši kurššin tunniksi etukäteh. Kurššilaiset jo tiijetäh, jotta tuiskukuušša hyö tiijuššetah enemmän Kalevala-eepossašta, ruvetah luatimah korttija, ošallissutah karjalaisen keittijön ta perintehellisien kisojen muasteri-oppiloih.
Suurta huomijuo annetah niise valmisteluh karjalankielisen šanelun kirjuttamiseh. Borovoin eläjät kirjutetah šitä jo monta vuotta ta toivotah parentua omie tulokšie.