Suomalaiž-ugrilaižes školas avaitihe ozuteluz, mitte om omištadud Rürik Loninale
Suomalaiž-ugrilaižes školas avaitihe” Rürik Lonin — vepsän rahvahan geroi’” - muzejan ozuteluz, mitte om omištadud Rürik Loninale. Täl vodel täudub 95 vot Šoutjärven vepsläižen etnografižen muzejan tegijan sündundaspäi.
— Lapsile ozuteluz om lujas mel’he. Eskai ezmäižen klassan openikoil, kudambad tuliba ozutelusen avaidusele, oli sur’ melentartuz’ Rahvahaližen muzejan pämehen Mihail Gol’denbergan starinaha. Lapsed tegiba küzundoid, sanuiba vepsläks erasid vaihid. Karjalan, vepsän da suomen keliden urokoil lapsed diskutiruiba ozutelust opendajidenke, jagasoihe ičeze tedoil Loninan kanzas, sanui Oma Mediale Suomalaiž-ugrilaižen školan pämez’ Natalja Barkalova.
Ozuteluz radaškandeb školas semendkun 30. päivhäsai da avaidase udes 2. sügüz’kud. Semendkun 30. päivhäsai ozutelust voiba kacta ei vaiše lapsed, no vanhembad-ki da mugažo lidnan toižiden školiden openikad, kudambad tuleba ekzamenoile Suomalaiž-ugrilaižehe školha.
Ozutelusen ekspozicijas starinoičeba nored volont’orad, kudambad opendaba vepsän kel’t školas. Sügüz’kun 2. päiväspäi kaik Suomalaiž-ugrilaižen školan openikad nägištaba ozutelusen.
— Minei ozuteluz toi vaiše pozitivižid melid. Minä tedan Rürik Loninan elon da muzeiradon istorijad, lujas kitän händast vepsän kul’turan muzejan tegemižes. Mugažo se om lujas tärged minun täht, sikš ku minun kanzas om vepsläižid jurid. Minun mamoi Valentina Mihailovna om sündunu da kazvanu Piterin agjan Podporožjen rajonas vepsläižes kanzas, jagoihe ičeze melil ozutelusen polhe Natalja Barkalova.
Ristitud voiba tundištadas ozutelusenke toižiš-ki Karjalan sijoiš , sikš ku sid’ se jatktab ičeze matkad Karjaladme.
