Starinoiče ičeiž külän polhe: Minun külä -konkurs jatktase
Sanutesiden Minun külä -konkurs jatktase. Konkursaha ottas sanutesid vepsän, karjalan da venän kelil vepsläižiden da karjalaižiden küliden istorijas, niiden eläjiš, muštpachiš, tetabiš ristituiš tekstas vai videos fotoidenke 15. sügüz’kuhusai 2025. Neciš starinoičeba konkursan tegijad ”Vepsän kul’tursebr” VKontakte-gruppas.
— Voi kirjutada vepsläižiden da karjalaižiden küliden elo-ozas, niiden starinoiš, külän eläjiš da muštpachiš. Voi kirtutaba miččes, mitte ozutab külän elod. Parahimad konkursan tekstad paindas Kodima-lehteses, sanub Kodiman pätoimitai Irina Sotnikova Oma Mediale.
Ühtnemaha konkursaha kuctas lapsid, lapsid, kudambad opendaba vepsän da karjalan kelid Karjalan valdkundan, Leningradan da Vologdan agjoiden openduzorganizacijoiš. Mugažo kuctas openikoid Petroskoin lidnan školiden 1.—11. klassoiš, Kalages, Šoutjarves, Šokšus, Piterin da Vologdan agjoišpäi. Mugažo konkursaha kuctas Petroskoin universitetan, Karjalan konservatorijan da kolledžan üläopenikad, kudambad opendaba vepsän da karjalan kelid, vepsän da karjalan keliden kursiden openikad, a mugažo ristitud, kudambad iče opendaba vepsän da karjalan kelid.
Miše ühtneda konkursaha, pidab oigeta fotod da pakičust počtale ”Konkursaha”-znamanke.
Kaikuččele tekstale tarbiž kuvatud fotol ristitun kirjutadud laskend. Nece pidab vahvištoitta, miše konkursan tegijad voiba kävutada fotoid ristitunke lehteses da internetas.
Konkursan lopus ühtnikad saba diplomid da lahjoid lahjsijoiš, mugažo todištusid ühtnendas konkursaha.
Konkursan sädajad oma ”Vepsän kul’tursebr” da ”Kodima” -lehtez.
Uzištoid neciš temas voib lugeda mugažo karjalaks da venäks.
