Sport da ilotuz: Änižröunas tehtas uz’ suks’keskuz
Karjalan rajonoiš paremboitas sportinfrastrukturad. Änižröunas linneb uz’ etnopark da suks’keskuz, miččiš taritas erazvuiččid holitesid. Sen polhe starinoiči TASS- tedotuzagentstv.
— Meiden planoiden mödhe, surehe keskusehe mülüba suks’lebukeskuz, adivpert’, restoran, etnopark, biznes-keskuz da jaugtehuded. Mugažo planuitas sauda uz’ nügüdläine jätandreh. Projektan todenzoitusehe om anttud 50 milliardad rubl’ad, starinoiči tedotuzagentstv.
Projektan tegii om piterilaine “Infinteh” -akcionerine ühtištuz.
— Etnopark abutab regionale tehtas parembaks turistoiden täht, sanui kompanijan pämez’ Angelina Jegorova.
Kaiken ližaks projektoid turistoiden täht tehtas Karjalan pohjoižes-ki, sikš miše tal’vpästusiden aigan äi turistoid lebaidase valdkundan pohjoižagjas.
Läz 25% investorad oma tehnuded turistprojektoid valdkundan pohjoižagjoiš. Rahad mugažo jagetas sauvotusehe da socialižehe sferaha.
Uzišt neciš temas voib lugeda mugažo suomeks.
