Sanoi Brendojevan kunnivokse kuuluu Anuksen kirjastos
Huomei, 6. syvyskuudu, karjalaine kirjuttai, Sammatuksen kylän poigu Vladimir Brendojev olis täyttänyh 94 vuottu. Jo 25 vuottu peräkkäi Anuksen kanzallizen kirjaston perustehel pietäh festivualii kirjuttajan mustokse. Festivuali jatkuu läs kogo vuvven aloh, sih kuuluu eri pidoloi da kilboi, festivualin jälgimästy päiviä tavan mugah pietäh Brendojevan roindupäivänny libo sidä vaste.
Tänäpäi perindöllizesti festivuali algavui avajazil Anuksenlinnan Polevaja-pihas, koin n:u 39 luo, kus jälgivuozinnu eli Vladimir Jegorovič. Sit rahvas käydih kirjuttajan kalmoin piäle.
Programmah kuuluttih literatuuručuassu da Marina Babalikan kniigan ”Letopis’ Läkköli. Kristall volšebnoi storoni” prezentatsii.
Pruazniekan jälgimäzenny pivonnu on pyöryžy stola Anuksen kirjastos, kudaman nimi on ”Kirjuttai Vladimir Brendojev minun elokses”. Paginan aloh rahvas musteltah, mittumannu ristikanzannu oli kirjuttai.
Anukselazet kaikin sanotah, ku kirjuttai oli ylen syväsydämellizenny, ainos tahtoi paista oman rahvahanke karjalakse, kiisti kieleh nähte, tozikarjalazennu olles oli padapiä. Oli festivualis kirjuttajan rodn’u Galina Terentjeva, lämmil sanoil musteli häi Vladimir Jegorovičua, kui pagizi kieles, merimiehenny olles saneli meres.
Tänäpäi, 5. syvyskuudu, Anuksen piiris vuozi 2026 on ilmoitettu Vladimir Brendojevan vuvvekse, lähiaigua roih luajittu orgkomitiettu vuvven pidämizeh niškoi, kunne rubieu kuulumah eri laitoksien ruadajii.
Kanzallizen poliitiekan ministerstvan ruadai Jelena Migunova saneli pluanois tuliekse vuottu, konzu kuulužan karjalazen kirjuttajan roindupäiväs täyttäy 95 vuottu.
Ližiä lugekkua Oma Mua -lehtes 10.09.2025.
