Randu: nelläs opastusfourumu on avattu
Onieganrannikon piirin Aino-huogavokohtas on allettu nuorižon Randu-opastusfourumu. Sidä pietäh kanzallizen Nuorižo da lapset -projektan hantuzis. Fourumah tuli yliopastujua, virguniekkua, tazavallan piirilöispäi tulluttu luvendoiččijua. Tänä vuon fourumah tuli rahvastu Karjalan eri kolkis, sego Piiterin, Murmanskan, Voulogdan alovehil da Sankt-Peterburgaspäi.
Fourumale pani allun Karjalan piämies Artur Parfenčikov. Häi vihjai, ku ”Randu” tavan mugah vedäy omah puoleh aktiivizii nuorii da andau mahton todevuttua uuzii projektoi.
— Myö voimmo ylbeillä meijän nuorien voittoloi. Meil on projektoi, kudamii kannattau Nuorižoazieloin federualline agenstvu, äijät aktiivizet nuoret suajah grantat omih projektoih tänän fouruman jälles. Kaikis tärgevin on, ku fourumu andau mahton yhtyö, paista, vaihtella mielii, sanoi Karjalan piämies omassah lehtistöpalvelule.
Randu-2025 -fouruman piäaihiekse on otettu nuorien harjaittamine sotsiualu-hyödyllizeh da yhteiskunnallizeh ruadoh. Luvendoloi ruvetah pidämäh Karjalan valdivoelimien edustajat — Karjalan haldivon premjer-ministru Andrei Sergejev, Karjalan syväinazieloin poliitiekas vastai tazavallan varapiämies Roman Golubev da toizet. Karjalan piämies Artur Parfenčikov käski kuččuo fourumah alovehellizeh Karjalan urhomiehet -programmah kuulujii erillizeh voinuoperatsieh yhtynyzii.
Tavan mugah fouruman aigah pietäh Rosmolod’ož. Granti -grantukilbu, kuduan fondu on 4 miljounua rubl’ua. Net juatah aktiivizimien kilbuniekoin keskes.
Opastusprogramman loppiettuu fourumah yhtynyöt suajah tovestukset kvalifikatsien korrendamizes libo fourumalazen tovestukset.
Aihies voit lugie suomeksegi.
