Praznik: ”Elonpu” kucub adivoid Vidl-külähä
Kezakun 11. päiväl Piterin agjas Vidl-küläs mäneb tradicionaline vepsläine ”Elonpu”-praznik. Se zavodiše 13-00 časud Vidlan päavoirdal. Ezmäižen kerdan tradicionaližel ”Elonpu”-praznikal starinoitas vepsläižiden sidos mecanke. ”Vepsän mec” — mugoine praznikan tem om necil vodel.
— Ei muite vesin jäl’genikoid kuctas mecan ristituikš. Mecoiden röuniš, pradedoiden da dedoiden mectusentehuzil vepsläižed ühtenzoitasoiš londusenke, mitte andab ristitule kaiken tarbhaižen. Se om kuti rahvahan hengine mamoi, hüvä i holekaz, no sil-žo aigal küzui, konz mecan sändoid muretas. Vepsläižed tedaba, miše mecas oma ičeze zakonoid da ižandoid, kudambid pidab arvostada, sanub lehtmez’, ”Svirskije berega”-gruppan ohjandai P’otr Vasiljev.
Praznikan adivoile ozutadas vepsän rahvahan tradicijoid, veroid, miččed om sidotud mecanke, marjoiden da babukoiden keradamiženke, mectusenke. Adivod voiba ühtneda erazvuiččihe mastar’-klassoihe, mujada vepsläšt emägust, kundelta eläbad vepsän paginad, kosketadas vepsän rahvahan tradiciojid da veroid. Praznikscenal ezitaškatas erazvuiččed kollektivad Karjalaspäi, Vologdan da Piterin agjoišpäi.
Kanman praznikad Vidlas tehtas mušteht tetaban vepsläižen garmonjan vändajan Sergei Abramovan muštoks, hän oli kaiken Priojatjen hengen.
