“Pohjolan kiilto” keräsi folklorin yštävie Louheh

Nuori festivali yhistäy vanhoja ta nuorie folklorin yštävie. 0+. Kuva: Louhen kultuuritalon Vkontakte-šivu

Pohjolan kiilto -festivalie piettih kolmatta kertua Louhešša. Festivali on omissettu karjalaisella folklorilla ta keryäy kollektiivija koko Louhen piirissä. Tänä vuotena 19 luovua ryhmyä tuli pruasniekkah.

— Tällä kertua meilä oli šuuri onni, jotta Čupa-pos’olkan luovat kollektiivit esiinnyttih konsertissa. Viijen yhtyvehen jäšenet enšimmäistä kertua oltih festivalissa, šano festivalin järještäjä, Louhen klubin kollektiivien johtaja Jelena Mihailova.

Yli šata artistie Louhešta, Čupašta, Kiestinkistä, Sohjanankošešta, Piäjärveštä, Aittaniemeštä näytettih luovie numeroja: tanššija, lauluja, runoja, spektaklija. Konsertin enšimmäini oša oli omissettu karjalaisella kulttuurilla. Šiinä oli Antonina Jakovlevan peruštaman Marjat-teatterin spektaklin enši-ilta. Kollektiivin kašvatit näytettih starina “Orava, niekla ta kinnaš” venäjän kielellä.

— Festivali on nuori, ka joka kerta šiih tulou yhä enemmän ošallistujie ta kaččojie. On mukava, kun kiinnoššuš karjalaiseh kulttuurih kašvau. Festivali on hyvin järješšetty, šillä on mieluisa ta lämmin ilmapiiri, kumpani vaikuttau kaikkih. Passipo festivalin järještäjillä, šano Marjat-teatterin johtaja Antonina Jakovleva.

Festivalin lopušša kultuuritalon näyttämöllä kaikki ošallistujat – noin šata ihmistä yheššä tanššittih Näin vedetään verkkaa -tanšši.