Ezmäižen kerdan Piteriš tehtas Pohjoižen naižiden forum, miččen ühtnikoin linneba ezinikad, sebroiden pämehed, opendusen da tedon ezitajad, tradicionaližen kul’turan tundijad vähäluguižiš rahvahišpäi.
Kezakun 5.—7. päivil Piteriš mäneb ezmäine Pohjoižen naižiden forum. Sen tegii om Pohjoižen, Sibirin da Edahaižen Päivnouzman igähižiden vähäluguižiden rahvahiden associacii.
— Foruman pätegendan om oiktusiden kaičend. Paginad linneba siš, kut voib vahvištoitta Pohjoižen naižen rolid, paremboitta Pohjoižen naižiden elod, ezmäi kaiked neniden, kudambad eläba kovas il’mištos, antta heile socialižid garantijoid, starinoičeb Vepsän kul’tursebran pämez’ Larisa Čirkova.
Foruman ühtnikoiden lugetiž om jo tehtud. Niiden keskes oma naižed: ezinikad vähäluguižiš rahvahišpäi, igähižiden vähäluguižiden sebroiden pämehed, naižed, kudambad vedäba tradicionališt rahvahan elomištod, opendusen da tedon ezitajad, tradicionaližen kul’turan tundijad i toižed. Forumaha ühtneškaba vepsän rahvahan ezitajad-ki.
— Karjalaspäi om koume mest: minä, Zinaida Strogalčšikova i Natalja Silakova. Natalja ezitaškab etnoparkad, starinoičeb biznesan socialižes vastusenpidändas, projektoiden polhe, miččid rahad voib sada regionaližel tazol, miše kehitoitta küläd. Zinaida Ivanovna starinoičieškandeb vepsläižiden etnokul’turižes jäl’genduses. Minä ozutan, kut projektoiden abul voib kaita kel’t da kul’turad, ližazi Larisa Čirkova.
Vologdan agjad ezitaškab Vepsän kul’tursebran pämez’ Ol’ga Smirnova, Piterin agjad – Podporožjen päkirjišton ohjandai Galina Artemjeva.