Piiterin kanzoinväline talovusfourumu: Karjal on solminuh enzimäzii sobimuksii
Piiteris tänäpäi algavunnuh Piiterin kanzoinväline talovusfourumu on jo tuonnuh enzimäzii tuloksii Karjalale. Petroskoih huavatah nostua uuzi zavodu, kudai rubieu luadimah aktiivuhiildy. Sobimuksen allekirjutettih Karjalan piämies Artur Parfenčikov da Hiimielline fourumu -laitoksen edustai Vsevolod Zdeh.
— Aktiivuhiildy käytetäh ilman da vien suodatukseh, viendyvien suodatus luguh ottajen, kirjutti Parfenčikov VKontakte-tiedottehes.
Hiildy valmistetah koivupuus. Zavodal huavatah käyttiä lähes 10 000 kubometrii koivuu kuus.
Karjalan piämiehen lehtistöpalvelun mugah laitoksen rakendamizeh annetah 300 miljounua rubl’ua. Uuzi laitos tuou lähes 50 uuttu ruadokohtua.
Ližäkse on allekirjutettu sobimus tufan louhindas Kondupohjan piiris.
— Tufan louhindas da tuf-tuottehien valmistamizes rodieu karjalan kaivandutevolližuon uuzi kehityssuundu. Tuf on mieldykiinittäi materjualu omien fiiziellizien da mehuaniellizien erinomažuksien puoles, kerdoi Parfenčikov omassah lehtistöpalvelule.
Pluanoin mugah louhindu algavuu tulien vuon tuhukuus. Louhindulaitokses rodieu 100 uuttu ruadokohtua.
Piiterin kanzoinväline talovusfourumu kestäy nelli päiviä da loppehes 21. kezäkuudu. Fourumua pietäh jo 28. kerdua. Pivon luadijoin mugah se on yksi muailman suurimis da merkittävimis biznessutapahtumis.
Aihies voit lugie suomeksegi.
