Petroskoissa on ilmeštyn uuši taito-objekti

Tavallini transformatorikoppi muuttu omaluatusekši taito-objektiksi. Kuva: Petrozavodsk govorit -portali.

Petroskoilaini taiteilija Andrei Ptitsin täyventi kaupunkin graffitikokomušta vielä yhellä piirrokšella. Nuori taiteilija mualasi Severnaja-hotellin pihašša olijan transformatorikopin kakši šeinyä vanhan kaupunkin näköaloilla.

– Mie yhissin kakši valokuvua ta šiitä tuli panorama: vašemalta on Leninin valtakatu, oikielta on Engelsin katu, a kešellä on paikka, mih myöhemmin ilmešty Severnaja-hotelli, kerto Andrei Ptitsin.

Taiteilija lopetti ruavon noin netälissä. Niin tavallini transformatorikoppi muuttu taito-objektiksi ta kaupunkin keškukšešša ilmešty vanhan Petroskoin kuva.

Uuvven taito-objektin luatimisen alkuhpanijana oli Karjalan halličuš, a tiluajana oli ORES-Petrozavodsk -ošakehyhtijö, kumpani omistau ala-šähköašemua.