Petroskois sanellah karjalazien runolois
Petroskois 24.-25. syvyskuudu pietäh seminuaru-praktikumu, kudai omistetah karjalazien runoperindöle da Pohjazen kandurahvahien eeppizele perindöle. Se järjestetäh Karjalazien runoloin vuvven hantuzis.
Seminuarah yhtytäh Karjalan Kielen, literatuuran da histourien instituutan ruadajat, Valentina Mironova, L’udmila Ivanova da Marija Kundozerova Karjalan konservatourien spetsialistat kui Vera Švetsova da Svetlana Nikolajeva da Igor’ Solovjov da erähät opastujat. Vepsäläzien runolois sanelou tutkii Ol’ga Žukova. Seminuarah yhtyygi Karjalan eri piirilöin opastundu- da kul’tuurualan ruadajii. Online-seminuarah yhtyygi tverinkarjalaine Marina Jevgrafova.
– Seminuaran aigua paistah runoloin nygyaigazes tilandehes, kui säilytetäh runoperindyö, mittuzii probliemoi on da kui niilöi pidäy sellittiä, sanoi Resursukielikeskuksen ruadai Natalja Denisova.
Kuunnella luvendoloi voibi internetan kauti. Ližiä tieduo da viittehen seminuarah voibi suaja Resursukielikeskuksen sivul.
