Petroskoin universitetan openikan ezituz korktas arvostadihe Mari-Elas
Marin valdkundaližes universitetas semendkus jo seičemenden kerdan mäni ”Suomalaiž-ugrilaižiden rahvahiden bohatuz’”-keskrahvahaline forum. Kaiked forumaha ühtni 220 mest ühesandes Venäman universitetaspäi. Üläopenikad ezitiba dokladoid 10 sekcijas kut Joškar-Ola-lidnas, muga online-ki.
Petroskoin universitetan baltianmren-suomalaižiden keliden kafedran 3. voz’kursan openik Tatjana Martjanova mugažo ühtni forumaha. Tatjana starinoiči vepsänkeližiden substantivoiden suffiksoiden polhe. Karjalalan ühtnikan ezituz oli korktas arvostadud da Tatjana sai ezmäižen sijan ičeze sekcijas.
— Minä ezmäižen kerdan ühtnin neche forumaha. Satusiš sanutihe möhemba, nece oli varastamata minun täht. Ezmäine sija lujas libuti minun henged da andoi tomotust völ edemba opeta kel’t, sanub foruman ühtnik Tatjana Martjanova.
Ž’urijouk arvosti valitud temad da tedoanalizan süvüt. Radon tedo-ohjandajan om Petroskoin universitetan opendai Ol’ga Žukova.
