Suomalaiž-ugrilaižiden rahvahiden liga todenzoitab eloho projektan ”Mušton aig”. Se om oigetud 8.-10. klassoiden openikoiden patriotižehe kazvatusehe. Petroskoin školiš vedetas interaktivižid urokoid kvizan formatas. Projektan ohjandajad ”Kiži”-muzejan radnik Anna Anhimova i Karjalan Rahvahaližen teatran aktris Aleksandra Aniskina tundištoitaba Petroskoin openikoid vepsän rahvahanke da sen kul’turanke, starinoičeba vepsläižes gerojas-tedištelijas Anna Lisicinan polhe.
— Om tärged, miše nügüdläine sugupol’v tedaiži i muštaiži nenid gerojid, ked ühtniba Surehe voinaha i tegiba urohontegoid, sikš ku küzeluz openikoiden da üläopenikoiden keskes ozuti, miše äjad ei tekoi Sovetskijan Sojuzan nimid. Meletan, mugoine format kut kviz om melentartušt openikoile i muga hö otaba päha miččid-se uzid tedoid, sanub Anna Anhimova.
Ezmäine mugoine urok jo mäni Petroskoin školas № 35. Kaiked interaktivižid urokoid vedetas vides Petroskoin školas, ned mäneškaba joga koumanz’päivän kerdan nedališ kül’mkun lophusai.
Projekt ”Mušton aig” vägesti Petroskoin administracijan tugirahan konkursas.