Petroskoiš mušttihe Rürik Loninad
Karjalan Rahvahiden sebruden kodiš mäni mušteht, mitte oli omištadud 95-voččele jubilejale Rürik Petrovič Loninan (1930–2009) sündundaspäi. Hän oli kodi-istorijan tundijan, Šoutjärven vepsläižen etnografižen muzejan tegijan, vepsän rahvahan kelen i tradicijoiden kaičijan.
Muštehtale kerazihe vepsläižiden küliden da Petroskoin eläjad — Rürik Loninan sebranikad da rahvahaližen kul’turan navedijad. Vastusen augotišes “Vepsän kul’tursebran” pämez’ Larisa Čirkova starinoiči adivoile Rürik Petrovičan polhe, sid’ kaik kacuiba dokumentaližen fil’man siš sures kodiröunan tundijas. Sen jäl’ghe Suomalaiž-ugrilaižen školan openikad lugiba runoid, a vepsän kelen opendai Nadežda Petrova starinoiči siš, kut Rürik Lonin vedi školas erazvuičcid mastar’-klassoid.
— Konz Rürik Petrovič tuleskeli meiden školha, hän kaiken sanui lapsile: “Enamba pagiškat vepsän kel’t, opekat sidä!” mušti Nadežda Petrova.
Ani lämän oli Viktor Loninan — Rürikan poigan — ezituz: hän lugi än’heze tatale omištadud čoman runon. Viktor jatktab ičeze tatan päazjad, istorijaližen mušton kaičendad. Mugažo hän radab požaroiden sambutajan, kezal ohjandab “Šeltozerec”-ecindjoukud, a sen ližaks Viktor om kirjutai. Muštehtal hän eziti ičeze uden “Lesnije izbuški” -kirjan (“Mecpertižed”) da lahjoiči sen ekzempl’arad kaikile tahtnikoile. Nece om starinoiden kogomuz, miččen pätemad oma laps’aig, prihaižiden sebruz’ da elo vepsläižes Šoutjärv’-küläs.
— Nece oli lujas läm’ mušteht. Oli ani melentartušt kundelta Viktor Loninalpäi siš, midä voib teta da muštta vaiše poig: mitte oli Rürik Loninan päiv, kut hän ehti tehta kaik — kirjutada, oppida, tehta maradod, ajelta tedomatkoihe erazvuiččihe vepsläižihe eländtahoiže i muga edemba, sanui “Oma Media” -portalale vastusen ühtnik Irina Sotnikova.
Ičeze muštlotesil mugažo jagoihe Šoutjärven muzejan pämez’ Natalja Anhimova da tedomez’ Zinaida Strogalščikova.
Tarkištele "Oma Median" Telegram-kanalad!
