Parahimad openikad saiba kuldad medalid
Täl vodel školiden pästnikad Änižröunas hüvin lopiba školad i saiba kuldad medalid. Vepsläižiden küliden školad oma korktad mel’t, miše heiden openikad ozutaba hüvid satusid.
Täl kerdal medalistoiden keskes om nel’l’ ristitud Šoutjärvespäi: Valerija Smirnova, Ksenija Kikinčuk, Karina Anisimova, Ekaterina Botvina da kaks’ openikad Kalagespäi: Aleksandr Ščesbakov i Marina Mališeva. Praznikvastusel, mitte mäni 9.heinkud Änižröunan administracijan pertiš, pästnikoid ozateli Ol’ga Šmajenik, ezmäine Karjalan parlamentan vice-paginik.
— Nene lapsed jaba Änižröunan istorijaha kut parahimad openikad. Nügüd’ heiden edes om avaitud kogonaine mir da erazvuiččed ted, sikš toivotan heile satusid da ozad, sanui Ol’ga Šmajenik.
Vanhembad da opendajad mugažo ozateliba školiden pästnikoid da toivotiba satusid elos da rados.
