Ozuttelu: Roindumuan čomuttu piirustajes
Priäžän joudoaijan luomisruavon keskukses on avattu Nikolai Vasiljevič Fiškovan kuvien ozuttelu. Priäžän eläjii ylen äijäl miellytetäh tämän petroskoilazen taidoilijan piirustetut kuvat. Ozuttelus on kaikkiedah kymmene akriilumualoil piirustettuu kuvua. Joga kuvas avavuu luonnon tiedohusmuailmu. Kummua näit, kui tarkah ei-ammatilline taidoilii maltau kiistin vuoh ozuttua omua rajattomua suvaičustu kodirandah.
— On hänen kuvis midälienne erinomastu, midä ei sua tavata: virduaju valgei, päiväine, ilmu. Täs ollah Karjalan lagevuot, luonnon čomus, meijän mečät, kuului rahvahas ozuttelus.
Enne eläkkehele lähtendiä Nikolai Fiškov sluuži armies Priäžän lohkol, nygöi eläy Petroskois. Oman enzimäzen kuvan “Gusi-lebedi” taidoilii piirustu alguškolas opastujes.
— Silloi minä luajin opastuskniigan, onnuako “Rodnaja reč”. Minä opastuin Priäžän školas, kus oli piirustuskerho. Opastai opasti meidy hyvin. Minun piirros kodvan aigua oli ruokos školas. Jälgikerdua näin sen omas školanlopendupivos, kummeksin silloi, mustelou Nikolai Vasiljevič.
Kaksi vuottu tagaperin Nikolai Vasiljevič kovah satatti selgyrungan, nygöi liikkuu ratas-stuulas. Mies oppiu paranduo da seizattuo jalloilleh, ga se on pitkyaigaine ruado da piirustamine auttau täl vaigiel taibalehel.
