Ota paikka -ohjelma oli esitetty Kantele-nuorisostudion konsertissa
Täyši sali kaččojie keräyty Kantele-yhtyvehen nuorisostudion loppukonserttih. Ohjelman nimi oli “Ota paikka!”. Ohjuajana oli Kanšallisen teatterin anšijoittunut näyttelijä Aleksandra Aniskina. Hiänki oli piäroolissa, apulaisena esiinty Anastasija Liukkonen. Koko konsertin aikana oli äijän erilaisie kertomukšie tärkieštä naispuvun ošašta - paikašta.
— Muamo ta tyttö ta nuorisostudion kašvatit avattih kummallini lipaš, šielä oli joka tapaukšella kaikenmoisie paikkoja, niin kuin Kantele-studion ohjelmistošša oli oma esityš niitä varoin: tanšši, laulu ta kantelehella šoitettu musiikkikappaleh, šelitettih konsertin järještäjät.
Joka vuosi Kantele-nuorisostudiošša opaššutah kymmenie taitonumeruo. Kantele-ansamblie johtau Aleksandra Saharova, eri ijän tanšširyhmien johtajina ollah Aleksandra Grišina, Tatjana Popova ta Aleksandra Sorokina, lauluryhmän ohuajana on Emma Jolina, lapširyhmän johtajana on Marina Tukkija. Konserttimuasteriloina ta šoittajina ollah Aleksandr Voitovič ta Alina Kartinen šekä Kantele-orkesteri.
Konsertin lopušša oli äijän kiitoššanoja. Yhtyveheštä tänä vuotena valmistautu nellä ihmistä, hyö šuatih kiitoškirjasie ta kakši ihmistä šai toviššukšen lisäopaššukšešta. Nuorisostudio mielelläh vuottau omah mukavah ryhmäh uušie lapšie kešäloman jälkeh.
