Opastu kieleh pienyössäh
Karelija pro100-kluubu ruadau pakkaskuus algajen 2020. Kluubah yhtytäh 25 lastu, kudualoil on 5-6 vuottu igiä, da heijän vahnembii. Urokkoi pietäh kerran nedälis, tuliel aigua kačotah pidiä net kaksi kerdua nedälis. Kluubas ruadau kolme kazvattajua – projektan kuruattoru Valerija Lihačova, Vera Polhovskaja da Mirja Hotejeva.
Sidä, mih lapset opastuttih urokoin aigua, ozuteltih avvonazel urokal kevätkuun 26. päivänny – lapset pajatettih karjalakse, kižattih karjalazih kižoih da kerrottih omis perehis. Karjalan kieleh lapsii opastau Mirja Hotejeva.
Valerija Lihačova käyttäy opastundan aigah uuzii tehnolougieloi. Interaktiivizih urokkoih niškoi Valerija valmistau iänetettylöi mul’tfil’moi karjalan kielel.
– Midä miellyttäy lapsii enne kaikkie? – tiettäväine, mul’tfil’mat. Niilöi kaččojes lapset da heijän vahnembat voijah opastuo kieleh koisgi, panna mustoh pajot dai runot. Mul’tfil’moi voibi välläh kaččuo Lumekellon internetsivul, saneli Valerija.
