On pandu rattahile kilvat lugijoile da taidoilijoile
Kostamuksen nuorižuo kehoitetah yhtymäh uuzih kilboih, kudamii pietäh Louhen kodi -projektan hantuzis.
— Kilboih vuotetah 5.—11. kluasoin opastujii da opistoloin nuorii. Voittajat suajah diplomat da mustolahjat, ilmoittau 64. parallel-verkojulgavo.
”Kalevalan” iäni -kilbu on tarkoitettu karjalazien runoloin lugijoile. Kilbuniekoil pidäy luadie Kalevalan runon ven’akse lugemizen video piduhuzin ei pitkembi kolmie minuuttua. Kaunis tagaperä da perindöllizet ruutat kaunistetah videodu.
Video pidäy sijoittua Kostamuksen tiijoituskeskuksen VK-joukon uudizih merkiten oma nimi, opastuslaitos da opastusvuozi. Sežo lyhyzesti pidäy kerduo, mindäh lugiettavakse on vallittu juuri se runo.
Sampo-melliččy — lapsien nägökulmu -kilbua pietäh kahtes nominatsies: ”Sampo suuruos” da ”Kyllyön mielikuva”.
Enzimäzeh nominatsieh vuotetah makiettoi, vestoksii, puuhizii, kangas-, savi- da metalluluajilmuksii. Toizeh nominatsieh otetah eriluaduzii piirustuksii — voil, akvarelil, guašil, pastelil luajittuloi.
Kilburuadoloi otetah vastah Kostamuksen linnan muzeis argipävinny sulakuun 20. päiväh suate.
Louhen kodi -projektu on voittanuh Pohjazen hyvys -fondan Ven’an pohjazen muzeit -programman XVI grantukilvas. Projektua todevutetah Severstal’-kompuanien kannatuksel.
Yhty Oman Median kanualah MAX:as!
