On ilmotettu parahat kantelehšovitukšet
Šovitukšen meštaruš kantelistien yhtyvehtä varoin -kilpailun tulokšet on ilmotettu. Kilpailuh oli työnnetty 11 tevošta Petroskoista, Kontupohjašta, Karhumäještä, Kalevalašta, Jessoilašta ta Ulan-Udešta. Kilpailukomiisi, kumpasen joukošša oli etnomusiikin tutkija Irina Semakova, kantelisti Irina Šiškanova ta šäveltäjä Anastasija Salo, valičči parahie töitä.
Šovitukšien šepittämisen kyšymyš on yksi tärkeimmistä Kantele-yhtyvehen toiminnašša, šentäh kilpailu ni oli järješšetty.
– Piäehotukšena oli še, jotta tevoš šais kommentin šäveltäjältä Anastasija Salolta ta olis parennettu hänen antamien neuvojen mukah. Šen jälkeh ruatoja lähetettih laulun ta tanššin Kantele-yhtyveheh, kerrottih kilpailun järještäjät.
Enšimmäisellä paikalla piäštih V’ačeslav Ivanov ta Tatjana Trunova, toisen šijan voittajiksi tultih Jurii Gladišev ta Anna Koval’ova, ta kolmannella paikalla oli valittu Nikolai Ol’šakov.
Kilpailu piettih Kantele Goes Global! Ground Zero -projektin rajoissa.
