”Oma Pajo” kuuluu Sordavalas
Anuksen karjalazien -liiton da Oma Pajo -horan yhtehine projektu ”Oniegas Luadogah suate” jatkuu tänä vuongi. Erähät projektan pidolois pietäh 17. pakkaskuudu Sordavalan linnas.
— Mennyt vuon projektan hantuzis jo käimmö Anukseh, Petroskoih, Sordavalah da Čalnan kyläh sanelemas lapsile karjalazien kieleh, kul’tuurah da perindölöih nähte, kerdomas Karjalan kandurahvahan muuzikkuperindölöis, ozuttamas, kui kuulutah kandeleh da jouhikko, pilli da torvi, sanoi Oma Mediale Tatjana Zaitseva, Oma Pajo -horan piälikkö.
Sordavalas omapajolazet 13.00 čuasun aigah linnan joudoaijankeskukses pietäh ruadopajat sordavalalazih nuorih nähte. Petroskoilazet horaniekat kerrotah karjalazien ruuttih da perindölöih nähte, ozutetah, kui da midä piettih piäl karjalazet rahvas. Sen jälles 15.00 ”Oma Pajo” vastavuu sodravalalazen Russkaja pesn’a -pajojoukon kel.
Projektan aigah omapajolazet jo käydih Petroskoin nelläh školah, piettih Kegrinpäiviä yhtes Sodravalan lapsien kel. Synnynmuan aigah ”Oma Pajo” tuaste piädyy Luadogan rannale Sordavalan linnah. Maidopyhälaskun aigah karjalazet pajattajat lähtietäh Salmih.
Projektua ”Oniegas Luadogah suate” pietäh Ven’an prezidentan grantufondan kannatuksel.
Yhty Oman Median kanualah Telegramas!
