Oma Media -portali: kolme vuotta verkošša
Šyyškuun 23. päivä on tärkie päivämiärä Oma Media -portalin istorijašša. Tänäpiänä myö vietämmä kolme vuotta šen avuamisešta. Šillä aikua portalilla oli julkaistu yli 6 000 uutista ta yli 700 artikkelie karjalan, vepšän, šuomen ta venäjän kielellä.
— Myö staraičemma valmistua monitašoista materialie, mi ois mukava eri-ikäsillä ihmisillä. Kirjutukšissa myö kerromma elämäštä Karjalašša. Statistiikka näyttäy, jotta meijän uutisie luvetah ei ainuoštah Venäjällä, ka i šen ulkopuolella, kertou portalin piätoimittaja Mikko Nezvitskii.
Uutisien lisäkši saitilta voit löytyä karjalaisien ta vepšäläisien kulttuurista kertojie videoita šekä iččenäisešti opaštuo karjalan ta vepšän kielen peruštehih. Šitä varoin portalilla on internetti-kurššit.
Portali aina kehittyy: kohta avatah kakši uutta ošaštuo — Oma Radio ta Oma Video.
— Oma Radio -ošaštošša šuau kuunnella podkastija karjalan, vepšän ta šuomen kielellä. Ajattelen, jotta tämä ošašto miellyttäy ihmisie, ket opaššutah karjalan, vepšän ta šuomen kielie, ta tuou heilä hyötyö, vet šielä hyö šuahah kuulla šanojen oikieta iäntämistä, koroštau Periodika-kuštantamon johtaja Natalja Sinitskaja.
— Oma Video -ošaštošša portalin kävijät šuahah tuttavuštuo kuin kuštantamon videoprojektiloih, kuin KV-šou ta Kuki Rikku, niin ni kaččuo videota, kumpasie meilä annettih meijän partn’orit: Karjalan Rahvahan Liitto ta Vepšäläisien kulttuurišeura, lisyäy Sinitskaja.
Aihiešta voit lukie niise venäjäkši ta vepšäkši.
