Šokšun školas avaitihe vepsän kul’turan muzei
Šokšun radnikad avaižiba školas vepsän kul’turan muzejan, miše lapsed voižiba sada tedoid vepsläižiden polhe ei vaiše openduzkirjoišpäi, no ičeze sil’mil nähta, kut eliba vepsläižed ende, miččid kaluid kävutiba ičeze elos.
— Nece muzei om hüvä abunik ližaopendusen täht, ved’ nügüd’ lapsed meiden školas voiba tundištadas vepsän rahvahan tradicijoidenke elon kaluiden-ki kal’t. Mugažo muzejas om keratud kaluid, miččed om sidotud Šokšun školan istorijanke, Suren voinanke, külän kanzoiden istorijoidenke, starinoiči vepsän kelen opendai Gleb Fomin.
— Nügüd’ mö openikoidenke vaumičem ekskursijoid vepsän da venän kelil, ližazi Fomin.
Muzejan täht om keratud jo äi kaluid, kaikuččel niišpäi om ičeze melentartuine da čoma istorii. Sen fond kaiken täutase uzil kaluil opendajiden, openikoiden da külän eläjiden abul.
