Kanman Opendajan päiväd Petroskoiš pauklahjoitihe hüväs rados Karjalan opendajid da lapsiden kazvatajid.
Kaiked pauklahjočendaha ühtni enamba 500 Karjalan opendajad. Heišpäi 76 sai arvnimid i arvznamoid eloradon mastarudes da Valdmehišton kitändkirjeižid. Arvostadud opendajiden lugus om Šokšun školan pämez’ Nina Koren’kova, hän sai Venäman openduzradnikan arvznaman.
— Sanutas, miše tugeta ristitud om muga-žo tarbhašt, kut abutada hänele miččes-se jügedas azjas. Kitän neciš arvznamas. Mugoine tugi andab väged sirttas edemba da tehta midä-se hüväd ičeze radon täht, sanui Šokšun školan pämez’ Nina Koren’kova.
Nina Koren’kova radab Šokšun školas pämehen seičeme vot. Neniš voziš hän tegi äjan školan hüvüdeks. Hän löuzi vepsän kelen opendajan školan täht, konz Šokšun školas pit’kha ei olend vepsän kelen opendamišt. Nügüd’ vepsän kel’t sigä opetas kaikiš klassoiš.