Šokšun školan openduzmahtištod korktas arvostadihe Jaroslavl’as

Konferencijal Nina Koren’kova eziti Šokšun školan radon mahtištod. Kuva: Nina Koren’kovan personaližes arhivaspäi

Opendajan vodel Jaroslavl’as mäni Rahvazkeskeine tedokonferencii ”K.D.Ušinskijan sur’kulud idejad: küläškolan kehitoitusen mahtod”. Konferencijaha ühtniba opendajad, tedomehed da azjtedajad erazvuiččiš Venäman agjoišpäi, a mugažo toižiš maišpäi. Kaiked konferencijaha ühtni 800 mest.

Konferencijal letihe aktualižid küzundoid, miččed koskiba küläškoliden kehitoitust da rahvazkeskešt ühthižtöd openduzalovehes.

Ičeze mahtištol kollegoidenke jagoihe Vepsän kul’tursebran ühtnik, Karjalan valdkundan valdhonusen ühtnik, Šokšun školan pämez’ Nina Koren’kova. Hänen dokladan tem oli ”Škol – etnosan kaičii”. Nina Nikolajevna starinoči vepsän kelen opendamižes školas da kut sündutada lapsiš armastust ičeze rahvahan kodikel’he, tradicijoihe da kul’turaha.

— Opendusen da kazvatusen pohjaze Ušinskii oti rahvahan principad. I ezmäi kaiked hän pagiži siš, miše ezmäine abunik neciš principas om kodikel’. A mö ani necen principan kävutam-ki meiden školas. Necidme tedme mö radam-ki. Mö zavodim opeta vepsän kel’t augotižškolas, jäl’ges keskškolas da päivkodiš. Mugažo kävutam kodikel’t opendusen irdpoližel aigal, projektoiden aigan, sanub Nina Koren’kova.  
Karjalan mahtištod korktas arvostadihe, lugetihe satusekahaks da perspektivižeks.

Karjalan opendajil-ki oli hüvä voimuz oleskelda sijaližiš küläškoliš, opetas Jaroslavl’an kollegoil da toižil ühtnikoil mihe-se udehe.