Karjalan tietokeškukšen Kielen, kirjallisuon ta istorijan instituutin nuoret tutkijat keškuššeltih männyön vuuvven ruavon tulokšista ta šuunnitemista enši vuuvvekši.
Nuorien tietomiehien neuvoštošša nyt on 16 tutkijua. Heijän johtajana täštä vuuvvešta alkuan on istorijallisien tietojen kandidatti Sergei Minvalejev. Viime vuotena nuoret aktiivisešti ošallissuttih kuuven projektin toteuttamiseh, järješšettih nellä tutkimušmatkua, esiinnyttih ta piettih konferenššija, ruattih koulujen opaššuštoiminnašša, autettih pityä kilpailuja ta oltih niijen arvoštelijajoukon jäšeninä.
— Niise oli ruattu aktiivini toiminta tietotutkimukšien popularisoinnissa. Myö julkaisima audipodkastija, valmistima kolme tietehellis-polularista šeloššušta, oli esitykšie Vodlajärven kanšallisešša puistošša, eri laitokšissa tietoaktijojen rajoissa. Nuorien tutkijien ta tietomiehien toiminnašta šai tiijuštua tašavallan viestinnöistäki, korošti Sergei Minvalejev.
Nuorien tietomiehien uutisista ta ruavošta voipi tiijuštua heijän ryhmäštä Vkontakte-verkošša. Tutkimukšilla ta tietomihillä omissettujen julkaisujen lisäkši šiinä on erilaisie kilpailuja ta interaktiivisie pitoja.
Vuuvvekši 2023 on äijän šuunnitelmie, enšimmäini niistä on šäilyttyä šuatuja toiminnan tulokšie, viettyä jo perintehellisie pitoja, kuin esimerkiksi retki Tiijon päivänä. Niise nuoret tutkijat ruvetah pitämäh pienie seminarija, jotta keškuššella nykytärkeistä kyšymykšistä ta miettimäh, mitein eččie mahollisukšie, jotta pitämäh enemmäm tutukimušmatkoja.