Nikolai Abramovan runotusen navedijad keradasoiš Podporožjen päkirjištos

Konferencijoil pagištas Abramovan runotusen temoiš, mel’kuviš, simvoloiš. 6+. Kuva: Irina Sotnikova

24. vilukud Podporožjen päkirjištos mäneškab regionankeskeine konferencii, mitte om omištadud Nikolai Abramovan sädandradole. Se keradab Nikolai Abramovan runotusen navedijoid, sebranikoid, openikoid da norid.

— Joga voden mö tegem azjtegoid Nikolai Abramovan muštoks. Necil vodel linneb jo nellänz’ regionankeskeine konferencii. Se tehtas kerdan kahtes vodes. Pätegend om kaita da popul’arizoitta Nikolai Abramovan sädandjäl’gendust, starinoičeb Podporožjen päkirjišton pämez’ Galina Anatoljevna Artemjeva. 

Konferencijoil pagištas Abramovan runotusen temoiš, mel’kuviš, simvoloiš, johtutadas hänen armhid runoilijoid, matkoid. Konferencijoiden materialoiden pohjal om paindud jo kaks’ kogomust.

— Konferencijoihe ühtneba openikad, üläopenikad, nored, opendajad, runoilijad, Nikolai Abramovan läheližed da sebranikad Piterin agjaspäi, Karjalaspäi, Piterišpäi da Moskvaspäi. Joga voden ühtnikoid tegese enamba. Necil vodel ezineškaba 12 mest, sanub kirjišton pämez’.

Tarkašti programmas voib lugeda täs.