Školiden vaumičuz udeks openduzvodeks om tärged da vastusenpidäi azj. Kus-se pidab tehta kohenduz, kus-se ostta tarbhaine kaludišt. Rad školiš päazjas mäneb keza-aigan. Tämbeižeks päiväks äjiš školiš radod om jo loptud i školad oma vaumhed vastata ičeze openikoid.
— Kohenduzradod om loptud. Škol om vaumiž udeks openduzvodeks. Kohendusen tegim ičemoi vägil. Pandihe uded uksed, vajehtadihe lava ezizalas da pertedeses. Materialoid völ ostim tal’vkus. Nece ozastui tehta varoid abul, miččid mairištadihe energiiefektivižen programman abul. Mugažo školha osttihe nügüdläine sportkaludišt federaližen “Sportklub”-projektan abul, sanub Šokšun školan pämez’ Nina Koren’kova.
Šoutjärven da Kalagen školiš päkohenduzradod om tehtud. Päivil Šoutjärven školas loptas panda uded iknad. Kalagen školas om joudajad radsijad, ectas fizikan, himijan, biologijan da anglian kelen opendajid.