Meččolan mifologija -karjalaini kalenteri esitettih Petroskoissa. Tänä vuotena šen teemana on Karjalan mečän hyvävirkaset mifologiset olennot ta šuojelun alla olijat lajit.
Karjalan kanšallisešša kirjaštošša pietyššä esittelyššä projektin jäšenet kerrottih vierahilla uuvven kalenterin olennoista ta vaššattih kalenterin lukijien kyšymykših.
— Enšin tahon koroštua, jotta še on ijänikuni kalenteri. Še merkiččöy, jotta šitä voipi käyttyä eri vuosina. Niise šiih voipi panna omie kirjutukšie, esimerkiksi merkitä šyntymäpäivie. Luatie šemmoni kalenteri meitä innoššuttih karjalaiset ikuset puisešta šauvašta luajitut kalenterit, šelitti idejan kekšijä, projektin kurattori Tatjana Berdaševa.
Kalenterissa on kirkkahie kuvie ta tietoja joka olennošta. Kuvittajana on taiteilija Al’ona Tsvetkova, tekstijä kirjutti Tatjana Berdaševa.
— Miula oikein himottais, jotta kalenteri olis starinamaini, täynnä hyvyä ta iluo. Šentäh valiččima hyvätapasie šankarija ta taiteilija ymmärti, mitä tunnelmua mie tahon šiirtyä kalenterin kuvien avulla, lisäsi Tatjana.
Vielä yhtenä kalenterin erikoisukšena on še, jotta joka kuvašša on šuojelun alla olija olento, a loppušivušša šuau lukie tietoja niistä.
Kaikki teemat oli näytetty esittelyn aikana pietyššä pelissä, kumpasen tehtävie luatimašša vierahat vielä šyvemmin čukelluttih Karjalaiseh mifologiseh meččäh.