Voimakkahimmat kyykkä-peluajat Tverin, Moskovan ta Vologdan alovehilta šekä Karjalan tašavallašta oli kučuttu avonaisih Ostaškov-kaupunkin kilpailuih. Kaikkieštah noin 40 ihmistä pelasi kyykkä-kentällä.
Kilpailut keššettih kakši päivyä: enšin oli pietty henkilökilpailut, šiitä joukkokilpailut.
— Myö enšimmäistä kertua kuččuma urheilijie toisista alovehista. Turnaukšen tašo oli tovellah korkie, šentäh kun šiih ošallistu viisi urheilumuasterie ta vielä monta urheilumuasterin ehokkahie eri kaupukniloista. Kyykkä-kilpailut voipi šanuo urheilumarafoniksi, šentäh kun ne keššettih noin 10 tuntie, šelitti Ostaškovin gorodki-pelin ošašton johtaja Aleksandr Logutov.
Henkilökilpailuih ošallistu 30 mieštä ta 8 naista. Miehien kešen voittajikši piästih Vladimir Tihomirov (Čerepovets), Jurii Krotov (Ostaškov), Aleksei Jerjomičev (Čerepovets). Naisien kešen kaikki kolme voittopaikkua šai Karjalan joukon naiset – Žanna Tikkanen (Kalevala) - kulta, Marina Lesonen (Kalevala) - hopie, Tatjana Pl’uhina (Sortavala) - pronssi.
— Meilä še oli vaikie ta tärkie voitto, šentäh kun kotikenttä on vielä lumen alla ta šemmosella talvikentällä tavallisešti on parempie tulokšie, kuin hiekkakentällä. Ostaškovissa jo ei ollun lunta, myö emmä ehtin harjotella kešäkentällä, piti heti kilpailla. Olemma oikein tyytyväisie voitošta, šano kyykkä-pelin urheilumuasterin ehokaš, Ostaškovin kilpailujen kultavoittaja Žanna Tikkanen.
Joukkokilpailuissa Karjalan naispeluajat niise šuatih kultua: TarVoi-joukko (Žanna Tikkanen ta Marina Lesonen) on enšimmäisellä paikalla, toisella – DUET-joukko (Inna Beluzina ta Tatjana Pl’uhina), kolmannella paikalla piäsi Seliger-joukko (Irina Šumailova ta Anastasija Jelisejeva).
Miešjoukkojen kešen oli lujempi taistelu ta voittajakši piäsi Lokotets-joukko (Ostaškov), toisella – Kustka (Ostaškov) ta kolmannella – Čerepovets-joukko.
Karjalan kyykkäpeluajat šanottih voittuo turnaukšešša kyykkärevanššiksi tuiskukuun Kontupohjan turnaukšešta, kumpasešša voittopaikoiksi piästih Ostaškovin kyykkä-peluajat.