Kyykkä kilpailuja pietäh muajilman mestaruon rajoissa
Leningradin alovehella, Priozersk-kaupunkih keräyvyttih kuuvven muan joukot. Venäjän, Šakšan, Valko-Venäjän, Kirgizijan, Kazahstanin ta Viron urheilijat ruvetah kilpailomah keškenäh.
Muajilman mestaruoh kuuluu kolme lajie: klassini, europpalaini ta šuomelaini gorodki-peli. Viimeistä lajie Karjalašša tiijetäh kyykkä-pelinä.
– Kilpailut keššetäh kuuši päivyä. Kolmešša lajissa valitah parahie peluajie. Kaikki kilpailut ollah avonaisie, jokahini voipi tulla niitä kaččomah, šanou Venäjän urheiluministerijön lehistöpalvelu.
Venäjän joukošša on 23 ihmistä. Venäjän gorodki-pelin liiton presidentti Nadežda Pavlova on varma, jotta tämän urheilulajin kehityš šuau hyvie perspektiivijä. Še niise šäilyy Venäjän kanšan kulttuurikoodie.
Muajilman meštaruon järještäjänä on Venäjän urheiluministerijö, Leningradin alovehen urheilukomitietta ta Venäjän gorodki-pelin liitto.
