Änižröunan vepsläižiš küliš, Kalages da Šoutjärves, čapatezsegoituz vaste COVIDad zavodihe kezakun lopus. Kut sanuba Kalagen FAP-an da Šoutjärven ambulatorijan medradnikad, enamba eläjid iče tahtoiba tehta čapatesen. Ezmäi kaiked nene oma školiden, lapsiden päivkodiden radnikad, pensiimehed, mugažo ned radnikad, kudambad radaba kivenke karjeroiš.
–Tahtnikoiden lugu tehta čapatez kazvab. Paksumba tuleba vanhad da rouhad ristitud, kudambil om jügedoid läžundoid, no heile voib tehta čapatesen. Mö tegem čapatesen kaikile tahtnikoile, eskai mehile, kudambad tuleskeleba toižiš agjoišpäi radmaha Kalagen karjeroihe vahtoil. Tahtoiže, miše enamba oliži norid, ked oma tervhed, no tämbei hö mäneba ohvotata, sanub Kalagen FAP-an feršal L’udmila Semakova.
Küliden eläjad voiba valita, kus hö tahtoiba tehta čapatesen – Kalages vai Šoutjärves. L’udmila Semakovan sanoiden mödhe Kalages läz 20-30% eläjid om jo tehnu čapatesen vaste COVIDad.