Sulakun 19.-25. päivil Timošinon školas online-formatas pidetas vepsläižen runotusen da prozan festival’ – ”Elokaz sana”. Täl kerdal konkursaha ühtneba lapsed Babajevon agjaspäi, Piterin agjaspäi da Karjalaspäi. Konkursan pätegend om kaita da kehitoitta vepsän kel’t da vepsläšt literaturad.
— Vaiše necil vodel festival’ tegihe regionankeskeižeks, edel se tehtihe školiden keskes. Konkursale oigetihe 26 pakičust. Nadeimoiš, miše festival’ tuleb hüväks tradicijaks, ühtenzoitab kaikid, ked tegeba suren radon vepsän kul’turan i kelen kaičendan da kehitoitandan täht, sanub konkursan vastusenpidäi, ”Purdaine”-fol’klorkollektivan ohjandai Ol’ga Jegoričeva.
Festivalin aigan tehtas mastar’-klassoid da vepsläižiden kirjoiden, openduzkirjoiden da vajehnikoiden ozuteluz.
Festival’ tehtas Vologdan agjan Vepsän kul’tursebran da Prezidentan grantoiden Fondan tugele. Tarkištelda konkursan ühtnikoiden ezitusid da sen satusid voib Vkontakte-lehtpolel.