Spartak-stadionilla 21.–22. tuiskukuuta piettih kyykkäkilpailut. Petroskoih tuli peluajie Karjalan eri piirilöistä šekä Tverin ta Vologdan alovehilta. Kova pakkani ei pölättän peluajie.
Kilpailujen enšimmäisenä päivänä urheilijat kilpailtih yksinäiskilpailušša ta parissa, toisena päivänä šekajoukoissa. Miehet ta naiset kilpailtih erikseh.
– Oli kova pakkani, ka lämmin ilmapiiri ta hyvin valmissetut kentät. On mukava, jotta meilä tuli peluajie Karjalan ulkopuolelta. Šamoin ilahuttau še, jotta tällä kertua kakši palkintuo voitettih joukot Karjalašta, vaikka viime aikoina niitä šuatih Karjalan vierahat, kerto kilpailujen tuomari ta šihteri Natalja Petrova.
Kilpailujen parahina peluajina tultih Jurii Krotov ta Žanna Tikkanen. Parikilpailušša voitti TarVoi-naisryhmä Kalevalašta ta Vieljärvi-ryhmä. Joukkokilpailušša voittajakši piäsi Red Hill -nimini joukko Sortavalašta A-ryhmäššä ta Čerepovec-joukko B-ryhmäššä.