“Kipinä” sanelou karjalazes perehes
Elokuun “Kipinä” on piässyh ilmah. Karjalankielizen žurnualan uvves noumeras on lugiettavua, arvattavua, kirjutettavua, pastettavua, käzin ruattavua da kiškottavuagi.
Uvven “Kybenyön” piätiemannu on karjalaine pereh, tarkembah sanuo — se, kui kazvatettih ennevahnas lapsii karjalazes perehes, mittumii oli taboi, perindölöi da uskomuksii sih nähte. Lapsen kazvatandas sanellah folkloristu Valentina Mironova da karjalazien perindölöin tiedäi Valentina Karakina.
— Školaniekoile uvven opastusvuvven kynnyksel “Kipinä” arbailou školavehkehii da kyzyy kohendua hairahtuksii, on valmisgi opastundukuri. Omas uvves ruavos saneltah Veškelyksen školas opastujat “Keksat”, sanou “Kipinän” piätoimittai Jana Filimonkova.
Niilöile, ket suvaijah kävellä laukkoi myöte, “Kipinä” valmisti oman šop-matkan, yhtel tiel puututgi Anuksen koufeilah. Käziruadoloin suveiččijoile “Kipinä” on valmistannuh täl kerdua luajittavakse kummallizen taloin kuivis keppizis.
“Kipinä” kuhkuttau omii lugijoi kirjuttamah žurnualah, työndämäh omii piirustuksii da toizii mieldykiinittäjii materjualoi.
