Kiestinkin eläjät omin voimin ruvettih ratkaisomah kyläproplemoja
Muutoma Kiestinkin kunnoštamisprojekti kyläläisien onnistu toteuttua omin voimin. Aktivistien ryhmä ilmešty kešällä.
– Tänä vuotena Kiestinkin eläjät ruvettih aktiivisešti ratkaisomah oman kylän kunnoštamisproplemoja. Enšin korjasima lapšien leikkikenttyä, šiitä hakasima penšahie tien mutkilta, jotta ne ei häirittäis autonkulettajie nähä mitä on mutkan takana. Mie nävin, jotta kyläläiset tahotah kunnoštua kotikylyä ta heilä on ajatukšie mitä vielä vois parentua kyläššä, ta ehotin järještyä alovehellisen yhteiskunnallisen ičehallinnon, kerto alkuhpanijaryhmän jäšen Ol’ga Kadirova.
Ičehallinto vielä ei ole virallisešti avattu. Nyt valmissetah viimesie asiepaperija, ka yleisö jo šuau nähä aktivistien ryhmän ruavon tulokšie Vkontakte-sosialiverkošša. Ryhmän šuurimpana ruatona on vesikolonkkien korjuamini. Rahua niijen korjuamisen annettih iče kiestinkiläiset, korjaušruavot niise piettih omin voimin.
– Enšin halusima korjata vain yhen kolonkan, ka rahua vielä jäi, šentäh korjasima nellä vesikolonkkua. Ruatoh mäni puolitoista kuukautta, šano Ol’ga.
Alovehellisen yhteiskunnallisen ičehallinnon järještämini antau mahollisuon ošallistuo projektien kilpailuih ta šuaha rahotušta niijen toteuttamiseh. Ajatukšie, mitä vielä ois hyvä korjata ta rakentua Kiestinkissä on äijän. Ensin tahotah korjata vesihettien kaivo ta kunnoštua lepopaikka Tuoppajärven rannalla, missä kyläläiset ta kylänvierahat tykätäh levätä kešällä.
