Larionovoiden pert’ oli saudud vodel 1908 Vehkojas. Pigai se tegese ”Kiži”-saren vepsläižiden tradicionaližen eländpertin ozuteluseks. Necen voden kevädel oli tehtud tarbhaižid märičusid, pigai pert’ vaumitas sirtta sarele.
— Muzei osti Larionovoiden pertin, miše tulijal aigal tehta sarel ”Änižröunan vepsläižed”-ekspozicii. Läz 40 vot muzejaha ei sirttud pertid da ei tehtud niiš kohendusid. Nügüd’ necidä radod ohjandab arhitektor Viktor Eduardovič Jandovskii, sanub ”Kiži”-saren projektiruindan erišton pämez’ Aleksandr Kuusela.
— Nügüd’ vepsläižiš pertišpäi sarel oma kaks’ aitad da kül’bet’. Üks’ ait oli saudud Oloncan rajonas, a toine — Bel’ajevan ait — oli sirrtud sarele Matvejan Sel’gaspäi. Foškinan kül’bet’ om Kaskezaspäi, sel’genzoiti ”Kiži”-muzejan radnik da ”Änižröunan vepsläižed”-sekcijan tegemižen radgruppan ühtnik Anna Anhimova.
Muzejan planoiš om sirrta sarele völ kaks’ vepsläšt pertid. Nügüd’ tehtas neniden pertiden ecindradoid. ”Änižröunan vepsläižed”-ekspozicijas linneb koume eländpertid, kaks’ aitad, hebotanaz da kaiv.
Nügüd’ ”Kiži”-muzejas diskutiruidas uden arhitikturižen kompleksan tegemišt. Se sijadase pigai saren pohjoižes poles Pudožan sektoran da Preobraženijan časoun’an keskes.