Venäjän tietoakatemijan Kielitiijon instituutin Venäjän kanšojen kielien šäilyttämisen, elvyttämisen ta asiepaperiloilla tovistamisen keškuš ilmottau Kevätkoulun alušta.
Kuin kannattua kieltä paikan piällä: analisoija tilannehta ta luatie oikien valinnan? Šiih kyšymykšeh vaššatah Venäjän kielien šäilyttämisen, elvyttämisen ta asiepaperiloilla tovistamisen keškukšen spesialistit kevätkoulun aikana. Šiinä on kolme ošua, enšimmäini alkau tämän netälin lopušša 22.—23. šulakuuta. Näinä päivinä online muuvvošša pietäh luventoja, kumpasissa kerrotah kielitilantehen analisin keinoista, šilloinki ošallistujilla annetah kotitehtävä.
— Enšišijasešti myö vuotamma koulun ošallistujilta aktiivista iččenäistä ruatuo ta kotitehtävien šuorittamista. Luventojen jälkeh heijän pitäy valita paikka ta analisoija kielitilannehta šielä, piättyä mitein kannattua kieltä šielä ta toteutua alottehie alovehella, šelitti projektin joukon opaštaja ta järještäjä Ol’ga Pavlova.
Kotitehtävie kačellah 29. šulakuuta, šilloin iče koulun ošallistujat vaššatah annetuih kyšymykših. Toisen ošan jälkeh projektin järještäjät toivotah, jotta tulou jatkuva tutkimuštyö šykyšyh šuaten. Šillä aikua koulun ošallistujat voijah toteutua omie projektija ta Tietokeškukšen spesialistit ruvetah heitä kannattamah.
Ilmottautuo Kevätkouluh ta šuaha lisyä tietuo šen ohjelmašta ta opaštajista voipi instituutin saitilla.