Karjalan tašavallan Louhen piirin šekä Murmanskin alovehen Kantalahen piirin kertomušperinnehtä on esitetty uuvvešša kirjašša. Šen valmistajana on Karjalan tietokeškukšen tietomieš, folklorin tutkija Marija Kundozerova.
— Kirja on Nina Lavosen kokomukšen “Kiestinkin kanšanlauluja” jatko. Vuotena 2013 mie henkilökohtasešti tutuššuin hänen kera ta hiän šano, kuin äijän materialie on instituutissa ta pitäy valmistua še julkaisomiseh, šelitti kirjan luatija Marija Kundozerova.
Materialien valmissuš kirjua varoin alko vuotena 2019, vuosi takaperin še neuvottih julkaisomisekši ta nyt kirja on valmis. Kirjašša voipi lukie Karjalan tašavallan Louhen piirin šekä Murmanskin alovehen Kantalahen piirin XIX—XXI vuosišatojen starinoja, legendoja, mifologisie ta istorijallisie tarinoja, ihmehšuarnoja karjalakši ta niijen kiännökšet venäjäkši. Niise on liiteh, kumpasešša on kerrottu julkaistujen starinojen kertojista, folklorin keryäjistä ta on näytetty Kiestinkin šeuvun kylien kartta. Kirjan painaušmiärä on 300 kappalehta. Ne levitetäh Karjalan kirjaštoih, kulttuurikeškukših, enšikši Karjalan pohjosešša.
Šuunnitelmissa on kirjan esittely. 29. oraškuuta še pietäh Koštamukšešša Viena-šeurašša. Marija kertou mitein kirja valmissettih ta lukou koštamukšelaisilla luvennon “Runonlaulu pruasniekka- ta arkipäivinä”. Šen jälkeh esittelyjä pietäh Kiestinkissä, Piäjärveššä ta Petroskoissa.
Kirjan valmistaja on Marija Kundozerova, tietotoimittaja — Aleksandr Petrov, arvoštelijat — Aleksei Konkka ta Nikita Petrov, kuvittaja Dmitrii Dmitrijev, kiäntäjät — Ol’ga Gorškova, Nina Lavonen, Marija Kundozerova, Natalja Vorobei, Andrei Osipov.
Kirja on painettu Arhippa Perttusen šiätijön toteuttaman Kotimuan voima -projektin rajoissa.