Vuokkiniemen kylätalošša tänä netälinloppuna pietäh Vuokkiniemen aapini -kirjan karjalankielisen kiännökšen esityš. Tatjana Tupina eli kyläššä ta ruato koulušša yli viittä vuotta. Koko šen ajan hiän omien opaštujien kera kerättih tietoja Vuokkiniemeštä. Tutkimušruato on kirjan pohjana.
– Koko miun elämä Vuokkiniemeššä oli omissettu löytölöillä. Mie ruavoin alkeisluokkien opaštajana ta miun luokan kera myö keräsimä äijän tietoja Vuokkiniemen istorijašta, eläjistä, paikoista, perintehistä. Kun lapšet lopetettih 4. luokan, myö valmistima kirjan venäjäkši ta viime vuotena šynty ajatuš kiäntyä še karjalakši, kerto kirjan käsikirjuttaja Tatjana Tupina.
Vuokkiniemen aapini -kirjašša kirjaimikon joka kirjaimeh liittyy pieni kertomuš. Lisäkši kirjašša on vuokkinimiläisien ta kylänyštävien ottamie kylän kaunehie valokuvie. Kirjan kiäntäjinä ollah Raisa Remšujeva ta Marija Spitsina. Kanši ta taito: Jens Hattuniemi, kuvašuunnittelu ta kuvien tekstit: Julija Filippova, Ol’ga Karlova ta Eeva-Kaisa Linna.
Vuotena 2020 Vuokkiniemi täytti 400 vuotta. Kirja on painettu juhlavuuvven ohjelman rajoissa, Karjalan Sivissyššeuran rahotukšella.