Karjalas praznuitas P’otr I 350-voččen jubilejan
Täl vodel mäni 350 vot ezmäižen Venäman imperatoran P’otr I sündundaspäi. Kezakun 25. päiväl pidetas Petroskoi-lidnan päiv, mitte omištadas P’otr I 350-voččele jubilejale. Karjalan pälidnas päpraznikazjtegod tehtas Änižen irdrandal. Mugažo P’otr I-le omištadud azjtegod mäneba ezmäižel Venäman ”Marcial’nije vodi”-tervehtoituzkeskusen sijal. 12. heinkud praznuitas Pühiden apostoloiden P’otran i Pavlan päiväd.
— Ezmäižes päivpoles P’otran apostolan puhäkodiš tehtas služb P’otran muštoks. Praznikale mugažo tuleb ”Gardemarin”-klub. Ehtal tervehtoituzkeskusen adivoiden täht mäneba P’otran assamblejad: kaikutte tahtnik voib ühteta mastar’-klassoihe, kus heid opetas kävutamha azeged i kargaidamha XVIII-voz’sadan karguid, sanub ”Marcial’nije vodi”-filialan pämez’ Oleg Mošnikov.
Necil vodel om völ üks’ znamasine päivmär Marcial’nije vodi-külän täht. P’otran apostolan pühäkodi, mitte oli letud P’otr I projektan i jonoštesen mödhe ezmäižen Venäman tervehtoituzkeskusen sijal, oli valatadud hänen olendas 300 vot tagaze – uhokus 1722. vodel.
— Necil vodel endištadihe medaljonoid i angeloid, jumalaižiden seinän ezmäižen rivin jumalaižid… Muzejan radnikad, endištajad i kacujad tegeba kaiken, miše kaita üksjaižen Karjalas puižen pühäkodin, mitte jäi jäl’genikoile P’otran aigaspäi, ližazi Oleg Mošnikov.
