Karjalan tugikohtat: 19 linnua da kyliä on vallittu
Karjalan tugikohtien luvetteluh kuuluu 19 linnua da kyliä, heijän vuoh ruvetah kehittymäh rinnalgi olijat alovehet. Tugikohtien luvetteluh, kuduan hyväksyi Ven’an hallindo, kuulutah Petroskoi, Kondupohju, Kostamus, Sordavala, Värtsilä, Kemi, Suojärvi, Porajarvi, Lahdenpohju, Anus, Karhumägi, Segeža, Pitkyrandu, Belomorsku, Puudogu, Kalevala, Piäjärvi, Lentiera da Priäžän kylä.
Federuallizen projektan ”Eländykohtien infrastruktuuran kehittämine” mugah linnois da kylis, kuduat on vallittu tugikohtikse, roitah liijat mahtot luadie rahvahale mugažat eländyolot. Karjalan tazavallan piämies erikseh korosti, ku niilöin vuoh ruvetah kehittymäh rinnalgi olijat kylät. Vuodessah 2030 eländyolot tiä tulou parandua 30% , vuodessah 2036 — 60%.
— Nelläle linnale luajitah omat master-pluanat. Eläjien kehoituksien perustehel vuvvennu 2024 moine pluanu on luajittu Kemi-Belomorskan aglomeratsieh nähte, se on kymmenevuodehine pluanu. Nygöi federuallizel tazol šeikuijah erähii pidoloi — sotsiualu-, transportu- da inženieruinfrastruktuuran objektoin luadimistu. Erillizet pluanat roitah Petroskoih da Kondupohjah nähte, sanoi Karjalan tazavallan pimies Arutr Parfenčikov omassah lehtistöpalvelule.
Paiči sidä Karjalan tazavallan piämiehen käskyn mugah oli luajittu pienembien eländykohtien luvettelu. Niilöisgi ruvetah todevuttamah pidoloin suurdu kompleksua. Jo tänä vuon Lahdenpohjan piirin Hiitolan kyläs alletah sotsio-kul’tuurizen keskuksen rakendamistu, kuduah sijoitetah äijät laitokset.
