Karjalan seiččei kyliä suahah hyvän telefonyhtevyön
Terväh loittozien kylien eläjät suahah käyttiä hyviä telefonan internettua. Federuallizen projektan lähimäine etuappu koskou kylii, kudamis eläy suas tuhandeh suate ristikanzua.
Karjalas todevutetah kanzallistu Tiedoloin siästämine da valdivon digitualine muuttumine -projektua Digitualizen eriarvožuon hävittämine 2.0 -ohjelman hantuzis. Tazavallale annettih tänä vuon seiččemen pos’olkan kvuottu. Joga vuottu Digitualizen kehittämizen ministerstvu kogo Ven’al pietyn iänestyksien mugah uvvistau kylien luvetteluu.
— Enne iänestyksen tuloksien mugah luvetteluh piästih Suojärven piirin Lahkolampi, Puudogan piirin Podporožje, Anuksen piirin Nurmoilu da Alavoizen souhozan pos’olku, Lahdenpohjan piirin Kulikovo da Välimäki, Segežan piirin Voldojärvi, on sanottu Karjalan piämiehen lehtistöpalvelun tiedottehes.
Pos’olkoin da kylien lopulline luvettelu hyväksytäh kodvazen mendyy. Projektan vuoh jatketah loittozien čuppuloin eläjien avvuttamistu da hyvän yhtevyön hommuamistu.
Yhty Oman Median kanualah MAX:as!
