Karjalan rahvahiden ezitajad kerazihe ministerstvas

Täl kerdal pätemoikš tehtihe federaline rahatugi da karjalaižiden valatusen 800-vozne jubilei. Kuva: Irina Sotnikova

11. talv’kud Karjalan rahvahaližen da regionaližen politikan ministerstvas mäni Karjalaižiden, vepsläižiden da suomalaižiden ezitajiden ištund. Sen aigan oli letud koume sur’t küzundad.

Pähomaičuz oli kingitadud sihe, kuna anttas tugirahad federaližes b’udžetaspäi “Valdkundaližen rahvahaližen politikan todenzoituz” -programman aigan. Dokladoidenke eziniba Karjalan rahvahaližen da regionaližen politikan ministerstvan erišton pämez’ Jelena Migunova i “Periodika”-painišton pämez’ Jevgenia Šustova. Hö starinoičiba, kut planuitas abutada Venäman igähižiden rahvahiden etnokul’turižele, ekonomižele da socialižele kehitoitusele tulijal vodel.

— Tugirahoiden jagamine om ani tärged azj Karjalan vepsläižile. Hüvä, miše meiden valdkundas om mugoine tugi. Vepsläižed, kudambid om vähä, eläba vaiše Kalagen, Šoutjärven da Šokšun küliden mal. Ned tugirahad abutaba kaita tradicijoid, kul’turad da kel’t. Nügüd’ sur’ homaičuz kingitadas vepsän kundaha, mitte kaičeb tradicionališt elonladud. Karjalas vepsän rahvahan tradicionaližid radod da radmahtod om kaiken aigan toižel sijal — päradon jäl’ghe. Vepsläižed kaičeba tradicionaližid kalastusen da mectusen mahtoid ičeze joudajal aigal, i nece pakičeb rahoid: tariž ostta verkoid, ongid, venehid, starinoiči “Oma Media” -portalale Čalnan külän administracijan pämez’ Natalja Silakova.

Toižeks sureks ištundan temaks tehtihe vaumištamine lujas tärktaks istorijaliž-kul’turižeks aigtegoks — karjalaižiden valatusen 800-voččen jubilejan praznuičendaks. Siš ičeze dokladas starinoiči Karjalan kul’turan ministr Aleksei Lesonen. Dokladas oli ezitadud tulijad praznikaližed azjtegod, festivalid, ozutelused, uded kirjad da kul’turjäl’gestusenke sidotud projektad – kaik, mi koskeb suren jubilejan praznuičendad.

Ištundan lopus ühtnikoile oli taritud tundištoittas voden 2026 Nevondišton radon plananke.

Karjalaižiden, vepsläižiden da suomalaižiden ezitajiden ištundad pidetas kerdan voz’nelländeses. Neniden aigan diskutiruidas valdkundan igähižiden rahvahiden aktualižiš temoiš da problemoiš.

Uzišt neciš temas voib lugeda mugažo karjalaks.

Tarkištele "Oma Median" Telegram-kanalad!