Karjalan tazavallan tervehyönhoidoministerstvan kehoitukses on luajittu da azetettu 186 nimilaudastu tazavallan liečetiedolaitoksis. Täs ruavos tervehyönhoidoministerstvua kannatti Karjalan tazavallan kanzallizen poliitiekan ministerstvu.
— Se on meijän panos Karjalan kandurahvahien kehittämizeh. Oma kieli miäriäy ajatteluu da muailman nägemyksii, se on kaikis tärgevin keino rahvahien keskipaginas. Oma kieli merkiččöy kanzan kul´tuuristu koodua da auttau kanzallizien tavoin da histouriellizen perindön kehittämisty. LIžäilemätä voibi sanuo, ku se on sildu mennyön, nygözen da tulien aijan välil. Etnizennu jakutannu olles (kanzan oma nimi — saha) ylen hyvin ellendän oman kielen säilyttämizen tärgevytty, sanoi enne tervehyönhoidoministru Mihail Ohlopkov omal VK-sivul.
Nimilaudazet on kiännetty vienankarjalakse, livvikse, lyydikse da vepsäkse.
— Minä kiänin 57 nimilaudastu ambulatourieloih da feršalipunktoih nähte Karjalan pohjaispiiriilöis, ku olen vienankarjalakse kiändäi. Oli erähii vaigevuksii, kyzyin nevvuo toizil karjalan kielen tiedäjil. Minun mieles, tämägi ruado auttau suaja karjalan kieli enämbäl nägövih, kerdoi Marija Remšujeva Oma Media -portualale.